Төрөхөөс өмнө хүүхдэд юу бэлдэх вэ?

Монголчууд төрөөгүй хүүхдэд төмөр өлгий гэж ярьдаг боловч хүүхдэд хэрэгцээтэй зүйлүүдийн талаар Та өөрөө, гэр бүлийнхэн тань мэдвэл хүүхэд төрсний дараа богинохон хугацаанд шаардлагатай зүйлийг авч болно.

• Хүүхдийн даавуу зөөлөн, ус сайн шингээдэг хөвөн даавууг хүрэлцэхүйц хэмжээгээр бэлдэнэ.   Мөн хүүхдийн шээсийг сайн шингээх сэвсгэр даавуугаар хийсэн живх бэлдэнэ.
• Өлгийг цаг агаарын байдалд тохируулан бэлдэнэ. Дулаан, зөөлөн, хөнгөн байх ёстой бөгөөд хүүхдийг гадаа авч явахад хэрэглэх өлгий эсвэл хөнжил байна.
• Хүүхдийн  ор, гудас, хөнжил, хулдаас, хөнжлийн  даавуу  зэргийг арчлахад хялбар, богино хугацаанд солих боломжтойгоор бэлдэнэ.
• Хүүхдийг усанд оруулдаг түмпэн, хүүхдийн ариун цэврийн хэрэгсэл, нярай хүүхдийн арьсыг арчлахад тохиромжтой зориулалтын хүүхдийн саван, тос, алчуур, хумсны хайч, хөвөнг зөвхөн хүүхдэд хэрэглүүлэхээр бэлдэнэ.
• Хувцас хүүхдэд зориулсан олон төрлийн хувцас байна. Нярай хүүхдэд 1 хоногт 4-өөс доошгүй ээлжийн хувцас бэлдэнэ. Үүнд: дотуур ба гадуур цамц, нимгэн малгай, нимгэн өмд, оймс. Мөн гадаа гарахад өмсөх дулаан цамц, малгай, бойтог зэргийг бэлдэнэ.